Tarbaεt n Tkerkas

Tennulfa-d terbaεt di tmetti yettnadin ɣef ccan d wazal war ma gan kra, tagi isem-is "Tarbaεt n tillas", "at wulac" i sen qqaren wagad iḥedqen >sidi flan d flan, welleh ma fflan ula d fellu!! Ma ɣer igwerdan, neɣ ɣer wagad ur neffiɣ ara si taddart ar ɣursen kan ay llan. Ihi sseḍmaεen medden s-imekwan n timuhla, ttnadin-ed akw ayen iḥemmel wemdan ur neɣri, ttnadin-as-d tuɣac s-ameẓẓuɣ, tidak yessganen alama d meɣrud, ur itteḥsis ara i kra anagar tizlatin nnsen, tamussni d ttussna a mmis Ṛebbi skerhen-asen-tt, sseɣlin-tt ɣer daxel n llbir di tarbaεt nnsen, tenna-yasen tmussni:
— Akwen ǧǧeɣ di ṛay nnwen yifit, a kwen yefk Yillew i wasif imi tugim abrid tafat.
Tarbaεt n tillas tufa tugett di teɣmert-is, tebda aεrak ameqqran deg wegdud-is, ur ḥebsen ara ula d ddqiqa deg waεrak, ttagwaden ad sen jjlun watmaten nnsen. Yenna-yasen yiwen degsen:
— Γelqet asen abrid ɣer uɣerbaz n tmussni d ttussna, ǧǧet kan tawwurt teldi ansi ara d-keččmen wungifen tessagwer tefrut am wakraren, akka ṭṣet ɣef sin imeẓẓuɣen.
— D ttikti tagi. Aselway s debbuz-is
Yekker-ed diɣen imegzi nnsen bu temkerriwin yerna-d ṛay-is — wagi d yiwen uεeggal nnsen yettmeslayen anagar tikerkas, ula d ttucḍa werǧin i-d-yecceḍ, yerna yessen ad yaru—ihi yenna-yasen deg wawal-is:
— Yessefk a d-nakwret, ur nettɣimi ara kan di twimas n yemdanen, iεeqqayen imeṭiwac n webrid n tafat nezmer a ten-id nernu ɣer terkeft.
Ma d addeyani nnsen yekker-ed daɣen yeger-ed iman-is, maca wagi d aderɣal, yetekka ɣef tεekkazt-is, yekker-ed s-unquqel, yeqqar -asen :
— Ala! Ur tefhimem ara ziɣ, amek ara takwrem tamussni? Tamussni tzerreε, tmeqqi di yal tama n umaḍal? Ziɣ kunwi welleh ar d iɣyal n tidett! Tamussni mačči d ttarbaεt tamecṭuḥt. Neɣ ma tukreḍ, am akken tukreḍ-ed amudd n waman deg yillel. Hhhhh
Dɣa kkren ssuffɣen daɣen addeyani di terbaεt n Tillas.
A.T