ASNERNI N TUTLAYT

Tamsat n usnerni n tutlayt di twaculin yers s waṭas ɣef imawlan. Imawlan yumnen s teqbaylit, a-naf bḍan ɣef sin yeḥricen, llan wid yessnen tutlayt kan tqbuṛt d wansayen-is, wigi yerna ḥedqen ur zmiren ad zeggren ɣef tutlayt n teqbaylit, ama deg wexxam neɣ di beṛṛa, d akken zik ḥemmlen Taqbaylit lɣaci, deg wasmi i-d-yusa Lmulud n at Mɛemmeṛ tenerna ugar, kra n medden ɣef Tamaziɣt umnen yis di yal tama, tewweḍ temsat-is n tsartit ɣer Icawiyen d Imẓabiyen, d Itergiyen neɣ Imucaɣ. Imir a-naf yuɣal-itt-id yiman s waṭas tezga tuɣ tmes-is. D acu i-d-yewwin 20 yebrir ? D anwa i-yessbedden Amussu Adelsan Amaziɣ ? Neɣ Agraw Adelsan Amaziɣ ? Neɣ tidukliwin tidelsanin ? Maca d imeɣnasen n Tmaziɣt akw d wegdud Amaziɣ . D aqbayli, neɣ d Acawi, neɣ d Amẓabi neɣ d Atergi, anda yra yili di temdint neɣ deg wedrar a naf ṭṭfen deg yinziz agi n Tmaziɣt, ttweṣin dderya nnsen akken a tt ttmeslayen di beṛṛa deg wexxam, ma di temdint xeṛṣum deg wexxam. Llan wid i tt yessawḍen ula ɣer lɣwerba, gan tidukliwin din-a, yecban: Fṛansa, d Kanada, d Lalman, artg. Annect-a yella ɣer taggara agi imi ukin aṭas n llɣaci s temsalt agi n tnaṣlit, Leqbayel d wagad nniḍen.
Llan widen iseqdacen tutlayt s wudem n tussna, si timawit ɣer tira d ttɣuri deg yedlisen, wigi daɣen fkan-as azal meqqwer i teqbaylit d ttmaziɣt, a-naf sselmaden-tt i-warraw nnsen, deg waya meṛṛa a-naf wid i-d-yufraren, a naf imyura, imedyazen, wid yessmuhulen s tmaziɣt, llan imeɣnasen, llant tlawin am akka, di tseddawiyin a naf gwten wid yessmuzuɣen, amedya deg iseggasen n 90 di Bgayet d Tizi-wezzu.
Deg wseggas n 90, Agraw Adelsan Amaziɣ igrew-ed azal 50 inelmaden di tannant iselmaden n Tmaziɣt, yessaweḍ yewwi-d mraw d aselmad di yal tamnaṭ, neɣ di kra n tantaliwin, yecban : Iqbayliyen, Icawiyen, Imẓabiyen, d Imuhaɣ. Ɣer Warraz n Lmulud n At Mɛemmeṛ, akken nniḍen a naf sersen-ed imuhal nnsen s yal tantala n Tmaziɣt i-d-bedraɣ.
Ihi iberdan banen, seg wseggwas n 80 i tebda Tmaziɣt tettenkar yettfiqi yis weɣref d ttutlayt am tiyiḍ, d ttutlayt i-ywata a ttwasɣer deg yɣerbazen n Lezzayer, d ttutlayt yellan deg yrebbi n wegdud amaziɣ awer lemmer aṭas n wid i tt yeǧǧan(deg wmezruy) ḍefṛen tutlayin tijenṭaḍin, wama tutlayt Tamaziɣt d nettat i d ttaneṣlit n Tmurt n Lezzayer neɣ n Lmeṛṛuk, neɣ n Tunes neɣ n Libya, artg... Lemmer a nezzi ɣer tallit deg yezureg Wammur n Tmazɣa(Tafriqt n Ugafa), amedya send anekcum n Waɛṛaben di 400 deffir Mɛ, tuttra, d acu n tutlayt sawalen imir, neɣ yessawal wegdud n Tefriqt n Ugafa ? Tillawt, amezruy a-ɣ-d-yerr "agdud imir yessawal tutlayt Tamaziɣt yebḍan ɣef kra n tantaliwin, tigi i-d-yegwran akka, Tacelḥit, Taqbaylit, Tacawit, Tamahaqt, Tamẓabit." Ihi yiwen ur yezmir ad iɣumm amezruy, acku amezruy am yiṭij, amezruy d netta i-ɣ-d-iskanen tillawt nneɣ, d ttillawt n wemdan s-umata. I-syen akkin Tamaziɣt yezmer ad yili wakud deg tella tɣerma-s.
AMAR TAFAT, AMYARU