Image_1513598987889


AGRAWLIW IKEMMLEN

Sɣur Amar Tafat


Si taddart n Tewrirt Mimun, seg At Yanni, babas d Salem At Maɛmmeṛ, fkan-d yiwen Umussnaw ameqqran i d isadren aẓaṛ n Imaziγen.

Dda Lmulud n At Maɛmmeṛ

 Yella d yiwen wemyaru ameqqran n tsuta i-γef i d terna tagi nneγ n wassa. Yebda tira seg yseggasen 40, ur yeḥbis alarmi yewweḍ and'ara naweḍ meṛṛa, ad yettwaṛḥem, ass n 29 di fuṛaṛ 1989 . Tamussni- s : " si dduḥ armi d aẓekka" akken yenna yinzi aqbuṛ.

 Dda Lmulud mačči kan d amyaru, maca d amussnaw, amassan. Ad t naf yura ayen n din n imuhal n tmussni d tussna. Yura ungalen(yecban: Tawrirt yettwattun, Tazegrawt, lkif d uɛekkwaz...), yura ammud n tullizin(yecban Msizzel...), yura ticequfin n umezgun, idlisen n tussna n tmetti, yecban "Lybica", yura tizrawin, d wammuden n isefra(yecban : isefra n teqbaylit iqbuṛen, isefra n Si Muḥ u Mḥend, adlis γef Ccix Muḥend u Lḥusin...), yerna amawal atrar: tamaziγt-tafṛensist.

 Annect-a n tira, a t naf d agerruj ar inefɛen tutlayt d yedles Amaziγ. A dγa imi Dda Lmulud d amussnaw ameqqran n Lzzaye(d Tmazγa), a t naf d netta i d azamul n tegrawla n 1980, d netta i d asafu yessaγen tafat swayes nettkemmil yal tikkelt abrid ar zdat, acḥal n wagad yeγran, d tinuddwin-is, ur rrin tidmi nnsen ar temsalt agi tuγdimt, n tnettit di tmurt n Lezzayer.

 Ass n mraw di meγres  1980, yekker-ed Umussnaw a d yefk asarag di tseddawit i ynelmaden isdawanen γef wedlis mucaɛen   "isefra n teqbaylit.  iqbuṛen". Imsulta gezmen-as-d abrid, ur teğğin ad yaweḍ ar tsedawit n Tizi-Wezzu. Seg Buxalfa i t rran ar uxxam n Ugezdir, squṛɛen i-wasif amer ad azzlen waman-is. Akken i s yenna Ccix Muḥend: "eg as d cceḍb i wasif ! "

 Maca ar deqqal kullec iqleb-ed fellasen, ffγen inelmaden asm' i d wwin s usalli, Dda Lmulud yettwaḥbes. Ffγen inelmaden n tsedawit, suγen γef Dda Lmulud, sulin azal is ar tegnawt, tamaziγt assen i d tban, assen i-slan yis at n tudrin  n tmurt n Leqbayel s-umata d wat n temdinin, d yal tiγmert di tmurt n Lezzayer. Wid yellan ṭṭṣen tikelt nni ukin-d di meγrud n wacḥal n zman,

Wid yemmuten ukin-ed ḍeggṛen-ed timedlinm. Kkren-d akw imaziγen, ffγen d ar temdint n Tizi-Wezzu, suγen akw " Ddren Imaziγen ! ". Refden senğaq, nuγen d yemsulta, γef tirrugza nnsen. Sebba n waya d Dda Lmulud n At Maɛemmeṛ. Imaziγen akw ttɛuzunt, uḥdiqen akw ttqaddarent, anagar agad yenzan s uɛebbuḍ nnsen i t iḥesben d menwala, am akken ḥesben tamaziγt yellan d taneṣtlt nnsen d tamsalt n yilem. Dda Lmulud di tama-s werğin istehza γef temsalt agi tuγdimt, yezga yettak fellas tuttra, yezga yettarra fellas tiririt s wawal nni aquṛan yecban uzzal, werğin tensa deg waɛrur-is.

 I syen akkin Dda Lmulud am yal tikelt yettkemmil leqdic-is γef yedles Amaziγ di Lezzayer d Lmeṛṛuk . Talluft n tmaziγt tettkemmil anfufed, seg 10 meγres i-bdant temesbaniyin, armi d warem yebrir, di 20 yebrir tenhewal tmurt, assenni ycuba tagrawla, at tudrin meṛṛa ṣubben-d deg ydurar(At Jennad, At Yiraten, At Yanni, Micli d Iɛezzugen, d Wat Σissi d At Dwala...), ar temdint n Tizi-Wezzu, akken ad snegmen izerfan nnsen.  Imsulta d lɛeṣkeṛ, usan-d s-ikamyunen, squṛɛen-asen di Wadd Σissi, agdud yudef ar temdint n Tizi-wezzu, myfken tt garasen, ass kammel, iḍ kammel d amdeqdeq, acḥal yeγlin d amejruḥ, acḥal wwin isekraf, i 24 yidsen i-ten wwin ar Beṛwagiya, ulac awezγi ur sen xdimen.Eslet i tezlitt n Lwennas Matub:"Iḥzen Lwadd Aɛissi.". Tizlitt agi tettciṛṛiw agwlim-iw.


 Annect-a i d neqqaṛ γef Dda Lmulud, maca netta di tudert-is werğin i d izzux yis. Imi mazal imussnawen ittmeslayen tidett, d awezγi ad yexlu wemkan n wergaz am wagi i tt iseddan "seg waman ar waman". Netta imehel kan s tidett d tsusmi, imi yeẓṛa du leqṛaṛ, tidett a d tenṭeq iman-is. Ladγa yeğǧa-d awal " yella walebɛaḍ, yella ulac-it, yella waleɛaḍ, ulac-it yella"

 Ihi, melmi i d yewweḍ warem yebrir, a d nemmekti tafsut n imaziγen, a d nemeslay γef 24 n imeḥbas, a d nernu γef ayen yega Dda Lmulud n At Maɛmmeṛ. Ad naf yega tirrugza tameqqrant, d netta i d llsas n trennawt n wassa. Lemmer daγen ad nernu a nesγez, ad naf d netta d sebba n timmunent n tegrawla n 54, d netta i yuran tabṛatt tameqqrant i yefkan udem n Lezzayer ar tmura Wegraw  yedduklen(l'ONU). Annect agi yella fellas d inigi  Mḥemmed Yazid, yenna t i d akka di Ṛadwu tis snat.

 A d nini kan Dda Lmulud n At Maɛmeṛ d agrawliw ikemmlen.


 

Masnsen Tamazgha a changé sa photo de profil.

Tajmilt i-Dda Lmulud

Sɣur, Amar Tafat

A d nemmektit ay atmaten, 
Wid nni yṛuḥen, 
Ǧğan aγ id tisura, 
Wid nni yettmeyizen, 
Widak a medden, 
Yettḥebbiṛen i taggara, 
γursen ameslay ẓiden, 
Winn' akken iweznen, 
D ufrin mačči d akwerfa. Imeslayen nnsen, 
Amzun d iḍṛisen, 
Ɣas heggi d imru i tira, 
Dda Lmulud yiwen degsen, 
Seg ymussnawen, 
A s nessiweḍ ṛṛeḥma.

Yura γef Imaziγen, 
Amezruy nnsen, 
Nett' i γ d yellin tiwwura, 
Yesssekfel d ayen yessen, 
Imru-ines yuzzlen, 
Tajeṛṛumt tura tekfa, 
Yerna gussan iwaɛṛen, 
Iɛemmed a t nγen, 
Ulac amkan yettağğa, 
Yewweḍ ar Itergiyen, 
Tamazγa meqwṛen, 
Yezzi yas id s umata.
Isekfel ed ayen yessen, 
Gwakal i t meḍlen, 
D agerruj n llfeṭṭa, 
D leqṛun fellas uzzlen, 
Yeqqim akken i yella, 
D afezzim nn' iṛeqmen, 
Wina tetteqen Dihya.

Ad ixdeɛ Ṛebbi kr'i yxeddɛen, Widak ineqqen, 
D amdan neγ d tamedda, 
Wwin yiwen seg yergazen, 
Deg wid nni yfehmen, 
Ajgu n llfeṭṭa, 
Akken kan nebda nfehhem, Tbedd aγ deg yedmaren, 
Nγant id di ɛin Defla, 
A Ṛebbi γurek yewden, 
Mneɛ it deg wsawen, 
Eg as amkan di rehma, err it seg Wid inewren, 
Ad yaf i yfazen, 
Axxam di Lğennet llaɛla.

Amar Tafat, fuṛaṛ 1990

---------------------------------------

● Aɣerbaz n tnaṣlit

Ar uγerbaz i d kecmeḍ, 
Am wuḥdiq ad ttγreḍ, 
Amezruy d imarrawen-ik, 
Asefru n zik a s tesleḍ, 
Gmaynut a tt wehmeḍ, 
Ad ttuγaleḍ ar tnettit ik, 
Ur iwat'ad ttenekṛeḍ, 
Amer ad ttimsuseḍ, 
Ad yemsu llbaṛud ik.

Amsawal, Amar Tafat

--------------------------------------

29 janvier 2017, 09:59 · Confidentialité : Public
J’aimeJ’adore
Adel Tafat et 74 autres personnes