TAGEJDIT - ÉDITORIAL
IZEN-IW
Awen in aruɣ tabṛatt agi s tutlayt-iw, tutlayt-iw am tin nnwen, imeddukal uḥdiqen d wid meṛṛa ara tt yeɣren s wul, imi i-s-fkan azal i tutlayt nnsen fehmen s waṭas, uḥdiqen zgan ttnadin, zgan ttnadin ad fehmen timsal n tmeddurt, yal wa degsen yefka azal i tmussni d ttusna, di yal taɣult, acku uḥdiq werǧin i-s-yenna "nek qeḍεaɣ-d tamussni", tamussni ayen din yeffren ur d-yeḍhir, ugar n wayen d-ibanen, ayen id-ibanen neɣrat, nwalat, win mazal la nteddu ɣures a t nɣer yiwwas.
Kunwi ay imedukkal i-d-yettarran i-teɣri yal tikelt, atan ttnemmireɣ-kwen s waṭas, ad awen iniɣ "affud ameqqran di leqdic nnwen n yal ass, d wayen s-umata i-wumi tettarram azal", d acu kan ummreɣ(feṛḥaɣ) s waṭas ma walaɣ-kwen tettarum tutlayt nnwen tamaziɣt s tugett mačči s cwiṭ, yerna tira a-d-tettas deg wemkan-is (tettṛuḥu srid ɣer wul), s webrid s-i nettaru meṛṛa, i-syen akkin tutlyat tamaziɣt s-immal a ttettnerna, akken ttalint tutlayin n umaḍal(du monde), a naf mačči weḥḥedsent kan akka ay srafgent, maca s wegdud nnsent uḥdiq i-sent-yegan leqraṛ . D ttakti yagi i-ssεiɣ nek armi ttaruɣ akka, yal ass armi d asmi i-d-wwiɣ iman-iw, llan wid i-s-yennan zik, ur yessin ara ad yaru, maca ahat cḍen, acku ahat d ttawil i-yxuṣṣen imir, nezra-d akw syen !! Wama, lliɣ ɣriɣ-tent yakw: tajeṛṛumt, tasnilsit, amezruy, tasekla, amawal, tamedyazt, taɣamsa, artg...
Nekwni newwi abrid n wagad i-ɣ-yeččuṛen ul d wallen, agaden ur nessin a-d-inin tikerkas deg wayen i-d-qqaren, neɣ deg wayen i-d-ttarun deg sebtaren (pages) nnsen, d yedlisen, acku yewwi-d a nefren, yewwid ad nissin d acu ara neddem, ur nettarfad ara akwerfa deg wemkan n uεeqqa, ma nedda s tiεewji atan nejla(nṛuḥ degsent), ma nṛuḥ degsent atan kullec iṛuḥ!! Amdan ur yessikkid ara kan iman-is, yessefk ad yettmeyyiz, yal m'ara yexdem kra alama imeyyez-as and'ara teffeɣ teqṣiṭ, ur ilaq'ara a-s-neqqar "awer d-terr aqnuc!!"
Amar Tafat amyaru, Izarazen
______________________________________________________________________________________________
TAMUSSNI NEƔ TUSSNA
Tamussni tettas-ed s zheṛ akw d win yettnadin fellas ussan d wuḍan, tussna daɣen taɛdel yides.
D acu i-ttamussni? D acu i-ttussna? Ihi sin iberdan iṣeggmen, maca ɣurwat a-tt-cḍem, acku d iberdan di sin, ɣas ulama mgarrden deg yini. Abrid n tmussni yessuffuɣ ɣer tafat, yezga d win iferrun tillufa, yettak-ed tazmert n yedles, tazmert n tsartit, tazmert n tfelsuft, d ayen yellan, d ayen yessiẓiden tudert, d ayen yettagan affud i-wemdan, d ayen i-d-yettaken tudert meqqren zeddigen, tudert icebḥen, tudert yeṭenṭunen, ɣas ulama ur tezmireḍ a tt-id teṭfeḍ s-ufus-ik.
Maca tussna, d abrid nniḍen iǧehdden ugar n tmussni, ɣas ulama d ttamussni i-d-yurwen tussna, tuɣal tugar-itt, tɛeddatt, acku tazmert-is meqwret, tussna tessnulfuy-ed tiɣawsiwin i-wumi nessawal tatiknulujit, d ttiɣawsiwin s-umata, seg tmecṭṭuḥ alama d ttameqqrant, seg zik alama d ttura, si tɣawsiwin n tineḍi alama d ttimacinin n luzinat, d tumubilat, d isufag d iɣeṛṛuba, d ttesnagurt, d ttujya, d-net, artg... Ad naf tussna tetteddu d wakud, yal akud d acu ara d-ssnulfun wid ur neggan aṭas, yal aseggas d acu ara d-yawi yides, yal aggur d acu ara ɣ d-ḍeggṛen i-nekwni seg wagad yesseblaɛen kan d aseblaɛ.
A.T.