TISSIRT

Asefru n Ccix Muḥend

1. Tissirt inɣec1 umenɣac2
2. aεeddal-is3 d aṛeḥwi4
3. imeẓdan la d-kkaten
4. kul wa i-geẓd' a t yawi
5. a win ɣef ishel walluy
6. ḥader iman-ik di trusi
7. yelha laεqel d lmaεqul
8. ṣbeṛ d aḥbib Ṛebbi

Lemmer ad nessif, neɣ ad nefsi tafekka d tɣessa n usefru agi a t naf yeččuṛ d inumak i yzemmren a-d glun s-ubaɣur i tutlayt, amedya ɣef udem n umawal, nezmer a-d nekkes awalen yemluqan degs d akken zik sseqdacen-ten degmi jlant tɣawsiwin nni swayes tteddunt, ula d nutni uɣalen jjlan yidsent. Amedya am wemyag yellan deg wsefru "inɣec" neɣ "nɣec" (sculpter) neɣ isem "amenɣac" (sculpteur), d akken di tessirt yella umenɣac ineɣcen iɣuraf n tessirt, i-wakken ad ḥercwen iɣuraf, acku aɣaref iḥeffu deg waṭas n tuẓda, ihi yewwi-d ad yenɣec. Yella daɣen yisem "aεeddal" (mécanicien ), win ixeddmen tissirt ticki teṛṛeẓ, win i-tt-yettqεaden akken a-tt-ssuzzer neɣ a tt ssirqeq iẓid (awren), yella daɣen yisem "aṛeḥwi" ( l'opérateur )d win isedduyen tissirt n wewren, tikwal a naf aṛeḥwi ixeddem-iten i snat, d netta i d aṛḥwi i d aεeddal!
A naf daɣen yeqqim-ed yinzi deg wsefru agi sawalent s waṭas leqbayel tegwti ur ẓṛin ara anwa i-t-id yennan, yili d Ccix Muḥend, win yekkren ad ak yini :

"a win ɣef yeshel walluy, ḥader iman-ik di trusi"

           A.Tafat