Azemmur i d-yettaken zzit…

 Tamurt n-imaziɣen

Deg waggur n nwambeṛ, neɣ deg taggara n yewǧiben, neɣ deg yiqecqacen, ad-naf tebda tessemhuyt n tegrest, asemmiḍ, ageffur, ṛɛud d yiggig d-waḍuyen! Tagrest aseggas-a tebda akken iwata, yefka-d Yillew ur icuḥ deg wayla-ines, ageffur d-asmiri ɣef tikelt i-d-yekkat! 

Ma neger  tamuɣli ɣer tɣawsa nniḍen yessɛan azal, tuttra fellas nettak-itt-id yal tikelt. Aseggas-a ma yurew uzemmur neɣ ala? Ihi azemmur asegggas-a di 2019 yurew akken iwata, yurew armi knant tzemmrin deg waken ččuṛent. Yerna-yas-ed ugeffur ussan-a, yuɣal iṛeɛṛaɛ! Tuttra nniḍen ɣef uzemmur, melmi ibeddu welqaḍ n uzemmur? Alqaḍ n uzemmur yebda si tura, deg wakud n-yiqecqacen, dduṛt-a i-yebda. 

Di tmurt n leqbayel deg yidurar-ines, yegwet uzemmur, d-igiman n tzemrin i-tsseɛu yal taddart, leqbayel s-umata ttalqaḍen azemmur, argaz tameṭṭut, aqcic-taqcict. Yal taṣebḥit, mi yeḥma kra wass, yekkes usemmiḍ imezdaɣ n yal taddart ad-ddun srid ɣer uzemmur, ttawin yidsen imextafen s-wayes i-d-zeggwin, iṣennajen, tiṣennajin, taqabact n leqḍiɛ, amger, lemqes, artgr… tiggi d-tillula seqdacen deg uzemmur.

Azemmur a-t-id leqḍen imawlan-is, yal amezdaɣ d-ayen yessɛa n tzemmrin, llan wid ur nleqweḍ ara ɣef wugur n webɛad n tzemmrin nnnsen, neɣ n tezmert, ihi ttakent d-amnaṣef i-wid yebɣan ad-leqwḍen.

Azemmur melmi yekfa s-lqweḍ a-t-awin ɣer tessyar neɣ ɣer lebraki, ad-d-yiẓed, ad-yuɣal d-zzit n tmurt akken i-s-sawalen at zik, neɣ zzit n uzemmur akken i-s-ssawalen tura. Maca, azemmur di tessirt neɣ di lberka, mačči d zzit kan i-d-yettak, maca yettak-ed tangiwin nniḍen yetteḥwiǧi weqbali, am: weḥba, ttawint-id di tessirt ssexlaḍ i-yesɣaṛen deg ukanun, times tgerriz s weḥba tetteddu akken iwata yis. Diɣen azemmur, yettak-ed abaliɣ, ssexlaḍen-as yiwen usafar ttaɣent-id zik di ssuq qqaren-as: ddwa n ṣabun, wagi d-ttilawin i-t-ixeddmen tiden iqeddcen di lebraki, ssuffuɣent-ed ayen din n iqulab n ṣabun.

A-d-nini kan di taggara, azemmur s wazal-is, ur iwata ad-t-ǧǧen imezdaɣ ur t xeddmen ara, yewwi-d ad-bedden ɣures s wefras, d welqaḍ-is, ad-rnun ad-leqmen wid yessnen, acku aṭas n uẓebbuj i-yellan, yewwi-d ad-ileqqem. Acku, azemmur d yiwet n tanga yessɛan azal, zzit telha aṭas i-tdawsa, tettqeṛṛiɛ yal aṭan, tneqq ula d ḥellejɣar, tessizdig tafekka n wemdan, tessedduy ahni akken iwata, d-nettat I d-aksum n yal ass! D-acu kan ur iwata a-tt-ssiwḍen ɣer igenni di ssuma n yedrimen, akken ur zmiren ad-tt-id aɣen medden, ad-tili s wazal-is ur tettṣub ur tettali.

                    Sɣur, Amar Tafat